Әлі екі жасқа толмаған стартаптың құны 8,2 миллиард долларға бағаланды — оны сатып алушы чип өндірушісі болды. AMD компаниясы Стэнфорд университетінің профессоры Фей-Фей Ли құрған World Labs-ты сатып алатынын мәлімдеді. Ли компьютерлік көру саласының негізін қалаушылардың бірі саналады.
World Labs индустрияда «әлем модельдері» деп аталатын технологияны жасайды: мәтінді, суретті немесе бейнені үш өлшемді, адам әрекеттесе алатын кеңістікке айналдыратын жасанды интеллект жүйелерін. Компанияның басты өнімі Marble роботтарды виртуалды ортада үйретуге қолданылады — бұл нақты әлемде оқытудан әлдеқайда арзан әрі қауіпсіз.
Мәміле толықтай AMD акциялары есебінен жүзеге асады және жыл соңына дейін аяқталуы тиіс. Фей-Фей Ли өзі AMD-нің атқарушы вице-президенті әрі бас ғалымы қызметін атқарады — яғни компания келешекте қандай модельдерге сүйеніп чип жасайтынын нақ осы адам анықтайды.
Бұл — AMD тарихындағы екінші ірі мәміле, 2022 жылы шамамен 50 млрд долларға сатып алынған Xilinx-тен кейінгі. Таңдау кездейсоқ емес: бәсекелес Nvidia-ның роботтар мен автопилотқа арналған Cosmos атты өз әлем модельдері бұрыннан бар, ал AMD-де мұндай құрал болмаған.
Назар аударарлық бір деталь бар. Ақпанда AMD World Labs-тың 1 млрд долларлық қаржыландыру раундына қатысқан, сол кезде компания құны 5 млрд доллар болатын. Жеті айдың ішінде баға екі есеге жуық өсті, дегенмен стартаптың нақты табысы әлі көп емес. Демек, AMD бұл жерде дәлелденген бизнеске емес, талантты адамдарға және физикалық ИИ-дің болашағына тігіп отыр.
