$518 миллиард — Anthropic алдағы жылдары бұлттық есептеулер мен инфрақұрылымға жұмсамақ болған сома дәл осындай. Бұл цифр инвесторларға арналған презентациядан емес, компанияның биржаға шығар алдында тапсырған IPO проспектісінен белгілі болды.
Claude жасаушысы 2025 жылы $42 миллиард таза шығын көрсетті, оның $34 миллиарды — қолма-қол ақшамен байланысты емес, қызметкерлер мен серіктестерге берілген опциондар мен варранттарды қайта бағалаумен байланысты бухгалтерлік есептен туындаған. Осыны алып тастасақ, операциялық шығын әлдеқайда қарапайым — небәрі $8 миллиардтан сәл астам. Ал табыс 12 есе өсіп, $4,6 миллиардқа жақындады.
Бірақ өсімнің әлсіз тұсы бар: жалпы табыстың төрттен бір бөлігі дерлік бар-жоғы екі клиенттен түседі, ал ең ірі тапсырыс берушілердің көбінде ұзақ мерзімді келісімшарт мүлде жоқ — олар кез келген сәтте OpenAI немесе Google-ге ауысып кете алады. Anthropic шотында $20,3 миллиард қолма-қол ақша мен қысқа мерзімді салым қалды, дәл осы қаражат болашақ табыспен бірге жарты триллион долларлық чип пен деректер орталығы шығынын жабуы керек.
Компания биржаға желтоқсаннан ерте шықпауды жоспарлап отыр — АҚШ-тағы қараша айындағы аралық сайлаудан кейін. Күтілетін баға $2 триллионнан асады, бұл 2025 жылдың мамырындағы $965 миллиардтық бағадан екі еседен астам жоғары.
IPO алдындағы туынды құралдар нарығы байсалды жауап берді. Anthropic-тің болашақ акцияларына байланысты келісімшарттар Binance пен Hyperliquid қоса он шақты биржада сатылып жатыр, олар шамамен 2%-ға түсіп, $1998-ге жетті — бұл қыркүйек басындағы шыңнан 10%-ға төмен. Трейдерлер шығын мен амбицияны бағаға бұрыннан есептеп қойған сияқты. Енді сұрақ басқа: тұтас саланың көлеміндей ставка ақталады ма.
